Tuesday, December 12, 2006
!! ااخ لو موجودة
... اشياء نحتاج وجودها بحياتنا نردد عليها عبارة ونكول اخ لو عندي فلان شي ، واخ لو موجود فلان جان صار كذا وكذا .. كل شعب اله فد عبارة او فد كلمة يرددها دائما على لسانة وبما انه كلمة اخ بالعراقي تدل على التحسر على عدم الحصول على الشي بالوقت المطلوب او المناسب ف نردد دائما كلمة اخ ... وبما انه الشعب العراقي ماشاء الله ماشاء الله مافد يوم راد شي وحصل علية مباشرة الا بعد مية اخ وااخ !! طبعا اجتي فكرة الموضوع على بالي اليوم بعد ماكررت كلمة اخ 99 مرة !! للتحسر على عدم حصولي على الشي اللي اريدة بالوقت الحالي تحديدا ولو مادام اني عراقي وبالعراق ف لازم استعمل كلمة اخ تالي بعدين احصل على الشي !! اكو من الاشياء اللي نحتاجها بحياتنا بشكل يومي ونكررها يوم بعد يوم وماتسبب الملل النا لان حاجتنا الها تفوق احاسيس الملل مثلا بالوقت الحالي الواحد يحتاج الموبايل هواية من يطلع من البيت ومن يرجع يحتاج يخابر ويتواصل ويه الناس هذا من دون الاستعمالات الحديثة والحصرية في العراق من تستعمله تكول بي لاهلك او حبيبتك عبارة تردد الآلآف المرات باليوم (( اني وصلت )) .. طبعا محد يدري انت وين بس المهم عرفوا بيك وصلت عساك وصلت الى القطب الشمالي بس المهم تطمن من حولك بهذي العبارة (وطلعت عن الموضوع) ارجع للاشياء اللي نحتاجها او مجانت موجودة بحياتنا ومن انوجدت هذه الاشياء حسينا نفسنا جنا ضايعين قبل من دونها اللي هية على سبيل المثال احاسيس الحب والاشتياق والكلام الحلو !! كل هذي جنا من يمر موقف كدامنا نتحسر على الموقف ونكول شوكت نمر بهذا الموقف او نكوول اخ لو اني ابدال ليوناردوديكابيريو جان سويت وكلت فلان شي (بس لو تطلع نخلة براسك ماتصير لا ليوناردو ولا حتى راسم الجميلي) !! مرات اكو حاجاتنا تكون لاشياء من خلالها تمكنا من ان تكون بمكان معين ( فلسفة ) يعني مثلا الواحد عندة سيارة يكدر يروح بيها الى مدينة الالعاب او لحديقة الزوراء ( بس بشرط لاياخذ الكبل مالتة ولا يشيل فلوس وياه لان بالحالتين يتسلب !! ) فيحترم نفسة ويكعد بالبيت ! ويخلي السيارة بالكراج ويصعد بيها العصر يشغل المسجل ويسمع جم اغنيية وتالي يقفلها وينزل ومن تمطر الدنيا يغسلها وهية بمكانها !! ترة حلو استعمالنا للاشياء !! اخ لو موجودة ... هنا راح تدور ( حلقة ) من الافكار على الشي المحدد اللي ادور حولة بالكلام واللي يربط حلقة الافكار بحلقة ثانية تكون ناتجها حلقة من مسلسل يبدي بكلمة احبك وتنتهي بتصبح على خير !! اخ لو موجودة هاي الحلقة اللي ادور عليها جان هسة اني بمكان او اكون الشخص اللي مسؤول عن الحلقة الاولى والثانية ومااتحسر على اي موقف اكول علية اخ لو جنت اني اللي موجود جان صار احلى واحلى !! بس ارجع وأكول آآخخ لو موجودة ...
