Monday, January 01, 2007
ــــــا GIFTS هدايـــ
حلو كلش ان يحصل الشخص على شي لم يكن في الحسبان او على البال الحصول علية، لهذا يكون طعم الحصول على شي مامحسب اله مسبقا مفرح جدا وعادة يسمى مفاجاة !! واكثر الناس تحب المفاجات واكيد المفرحة فقط. المفاجاه يجوز تكون خبر او تكون حدث معين او تكون رؤية شخص او تكون هدية ف اذا كانت هدية راح تكون من شخص قريب او شخص يحبنا ونحبة، حلو ان يحصل الواحد على هدية بمناسبة معينة او بوقت معين بالفعل تكون مفاجاة حلوة وخاصة اذا جانت من الشخص اللي نحب !! راح تضل عايشة ويانة طول عمرنا لان هية من شخص طبع اثر وجودة على حياتنا وبقى ويانة متواصل بكلمة ولقاء وعمر.اليوم 24/12/2006 حصلت على هدية بمناسبة رأس السنة واني ماماخذ هدية من قبل بمناسبة رأس السنة أكيد تصير هذي الهدية مفرحة كلش لقيمتها المعنوية ومن تكون بمناسبة حلوة وبوقت حلو تميزها مو بس بشكل الهدية ومحتواها المتميز جدا واللي عجبني بس الاحلى من نحس ونعرف منو هوه الشخص اللي منحني اياها لان اساسا اعتبر رب العالمين اهداني هذا الشخص هدية للعمر كلة ان شاء الله ، فشلون هية الهدية وتقدم هدية !! بس صدك شلون صارت اول فكرة الهدية وتطورت وصارت تقدم بمناسبة وبوقت وتتغلف وتمنح مع ابتسامة وكلمات !! عبالك احس بيها فد اسطورة لشي تكرر عبر قرون وشكد تترك اثر مفرح للشخص الممنوح للهدية !! الله الله عليك ... وشنو هذا التاثير النفسي المفرح المتواصل كلما شفت الهدية يمك !! الهدية اليوم جانت متكونة من 3 قطع داخل علبة حمرة حسيت كل جزء منها يحجي عن نفسة لساعات متواصلة ف الساعة راح تذكرني ولساعات بكل الوقت الحلو اللي كضيتة وياك واللي راح اكضي ببقية عمري .. والقلم هذا اوعدك بان اول ماراح يكتب راح يكتب كلمتين الكلمة الاولى احساس والثانية اسمك .. وحتى الميدالية اللي بيها بوصلة فما راح تشير دائما للشمال مثل مامعروف وانما راح دائما تشير الى الجهات الاربع لان انتي موجودة من كل جهه وياية ...فرحت بيك وفرحت بهديتك وفرحت بشوفتك .. وراح افرح بيك العمر كلة ... المشكلة النت مافاتح من شهر تقريبا .. ومااتصور اكدر اضيف شي على هذا البوست لان ماادري باي وقت تنطفي الكهرباء او النت يوكف ولو هسة اساسا وكف بس بعدني احاول ان افتح النت وانزل البوست هذا صح يجوز الكلام كصير بحق الموضوع بس هوة تدوين لحداث أحب أكوله وأحب أذكره ..
