Let's B Friends

1+1 معادلة وان كانت بسيطة بس بواقع الحال من تقاس على الاشخاص تكون معقدة اكيد راح تكولون شلون الواحد زائد واحد اكيد اثنين بس ماممكن ان يكون الناتج واحد بوجود الواحد الثاني الا اذا انجمع وياه وهذا الشي مايختلف علية اثنان، الواحد يحتاج الى الواحد علمود يكون اثنان بس مرات يكون الواحد زائد واحد يساوي واحد شوكت تصير هاي الحالة من يكون حاصل جمع الرقمين بشكل خيالي وبشكل روحي مبني على اساس تبادل مشاعر الحب والاحترام فيندمج الواحدان ليكونا بالنتيجة واحد .
لغة الارقام تكرر هواية بحياتنا يجوز من يعتبرها مجرد ارقام حسابية ويجوز من يستعملها كانما تقاس على مبالغ مالية ومن يستعملها على ان يحسب بيها اشياءة ومنهم من يحسبها اشخاص فالواحد عندي هنا مو رقم وانما يعني شخص واحد هذا الشخص الواحد اللي كل اللف والدوران بالكلام راح يكون علي .. لان هذا الموضوع اجه على بالي وحولت الفكرة مالتها الى فكرة رياضياتية ليش حولتها الى فكرة أرقام لان اليوم حسيت بهذا الواحد جان ضايج شوية بالنتيجة الواحد الثاني بالتأكيد مايرضى ان يكون الواحد الاول ضايج وراح يضل الواحد الاول يفكر ويحاول ان يزيح جزء من هاي الضوجة من الواحد الثاني اللي اتصور همة بالنتيجة مو اثنين وانما واحد (هاي احجي عن احساسي تجاه هذا الواحد بنفسي) !! ...
من اكون اني واحد بشنو راح افكر ؟؟ اكيد راح افكر بالثاني زين منو الواحد الثاني اللي ممكن ان افكر بي من اكون وحيد ... ضايج ... مقهور ... فرحان ... او حتى جوعان !! اكيد راح يكون هذا الواحد شخص احب ان اتذكرة وذكره كفيل بان يزيح الحزن اللي اني بي لوجودة وياية واكيد اذا راح اتذكرة واني فرحان راح يزيد من فرحي بذات الوقت .. يعني بكلام ومعنى اخر من احس بنفسي ضايج احاول ان اصرف تفكيري عن الشي اللي مضوجني وخاصة اذا كان هذا الشي اللي مضوجني مااكدر ان اغيرة او اكدر ان اغيرة بس بصعوبة فبذاك الوقت راح اندار على نفسي واكول اني ليش شاغل نفسي هيج ومدوخ روحي وحاط نفسي بمواقف راح يشغل ويتعب تفكيري اللي هوة اصلا تعبان بس والحمد لله ديرتاح هذا البال والفكر بسماع او شوفة اشخاص معينين اللي همة حاصل جمعهم وياية يكونون بالنتيجة واحد ليش لان يحس بما احس ويتأثر بما أتاثر اذن هذا مو شخص اعتيادي هذا رحمة من رب العالمين انه وهبني هيج شخص خلاني انسى همومي من خلالة او اشوف فرحي المتواصل من خلالة ... بالنهاية راح اوصل الى نتيجة واكول خليني افرح بنفسي اولا وتالي افرح بوجود اشخاص مالين علية يمومي وجزء من حياتي .. لان ماكو احلى مما شخص ينذكر بمكان وهوة ماموجود بي هذا يكون احلى من يكون موجود بنفس المكان ويذكر ويمتدح لان وان غاب هذا الشخص او الواحد فهو حاضر لايغيب على البال ... اكيد من راح تقرة هذا المقال يا (واحد) راح يشيل جزء من السبب اللي مضوجك ... فيا (واحد) اذا حبيت دائما ان تنسى همومك تذكر الناس اللي يحبوك وتذكر الساعات الحلوة اللي تكضيها بوجودهم وياك فهي الكفيلة بان تروح كل الهموم مثل ماوعدتك في يوم من الايام ولحد اليوم اني عند وعدي بان مااضوج على شي بس هسة اكو شوية اخلاف بالوعد منك ... لان جان الوعد متبادل ...
يلله ياواحد ويامن اقصدة خلينا نتذكر الايام الحلوة بس مانتحسر عليها لان احنا عايشين بضرف استثنائي بس برغم هذا الضرف اكو من يضحكنا ويناقشنا ويغير علينا اليوم والمود اللي احنا بي ..
طبعا حصيلة كلامي واقيس هذي الحصيلة على نفسي لان بصراحة هاي المعادلة دوختني كلش اللي مبداها 1 + 1 = 2 بس اتصور اني طلعت بهاي المعادلة بحصيلة خلت عندي وعد ثاني بان مااضوج من شي لان اكو الثاني الي وهذا الثاني مادام يمثل الي شي جبير كلش فكل هم راح ينزاح ...
معادلتي النهائية الك راح تكون 1+1=2 صح ماكو مشكلة بس اللي مجنني شلون انتة واحد وتساوي عندي الدنيا كلها !!