Monday, June 26, 2006

 

F R I E N D S

اليوم راح احجي عن اهم موضوع ممكن ان يكون الي وهوه العلاقات والصداقات بصورة عامة وماينتج مابعد الصداقات.
طالما جان همي الوحيد بحياتي ان اكون اصدقاء متنوعين اكثر مما يكونون هواية علمود تكون اكو نوعية وليس كمية والحمد لله وفقت دائما باختيار اصدقائي بكل ميادين حياتي اللي عشتها لحد الان من الدراسة والعمل .. اول ماجنت اخطو خطواتي الاولى بمكان عمل او مكان راح التقي بي يوميا مثل الكلية جنت اثبت صداقاتي فوق كل شي واختار الاصدقاء اللي يمثلون جزء من شخصيتي واللي ممكن ان اعتمد عليهم ويعتمودن علية من امنحهم كلمة صديق او اكثر ...
بكل مرحلة من مراحل عيش الانسان راح يتعرف على اصدقاء جدد لان طبيعة الانسان وبالفطرة دائما يبحث عن شي ويكتشف اشياء وهذا الحجي قريناه من زمان وعرفناه ولمسناه بانفسنا وبدينا نطبقة كل ماندخل بمجال معين , فجانت دائرة الاصدقاء تتوسع وتزيد العلاقات المختارة يوم بعد يوم وسنة بعد سنة ... وصارت مجموعة من العلاقات اللي من المستحيل ان نفكر بيوم من الايام ان نبتعد عنها ولا حتى ممكن ان نخلي اي عائق من العوائق وكانما نحس نفسنا دنعيش عالم خالي من المعوقات والضروف الصعبة واختلافها ، ف جان من يختفي شخص معين نكوم نسال علية وندور على فلان وعلى فلان علمود يوصلنا له ونشوفة تالي بالنهاية ونعرف انه مر بضرف معين هوة اللي خلاه يتركنا ولو لفترة كصيرة بس جانت بعينا فترة طويلة لان مامتعودين على الفراك بيناتنة .. من هذي المواقف اذا نقيس منها فهي صايرة كومة واكو بيها احداث اللي تخلينا ننقهر على فقدان احد الاشخاص ومرات ننقهر على نفسنا لان بذلنا وصرفنا فترة من فترات عمرنا وياه والحمد لله هذي ان شاء الله ماتصير او ماتتكرر اذا جانت صايرة ...
بمكان العمل مالتي والاكثرية اللي بي همة من عمري تقريبا هناك تحس بوجود كم هائل من الاصدقاء المتنوعين والمختلفين وحتى من المختلفين بالديانة بس مايفرقنا شي لان كلنا جايين على هدف واحد هوه الشغل ... هناك كونت مجموعة من اروع الاصدقاء اللي صاروا جزء لايتجزا من الايام لان وقت الدوام هناك وقت طويل جدا يعني جنت اشوف اصدقائي اكثر مما اشوف اهلي وحتى اكثر مما اشوف بيتنا .. فصارت بيناتنة مودة موطبيعة وتقاسمنا كل ايامنا وصبرنا واحدنا الاخر على كل ضرف وكل محنة جنا نمر بيها ,, وضحكنا واحد على الثاني ونصبنا واحد على الثاني وجانت كلها تصير هاي الامور بوجود هذا الكروب اللي تعرفت علية واللي ماتوقنا بيوم انه نتفارك وحتى اذا تفاركنا او تركنا مكان العمل اكيد راح نتركة كلنا مثل مااتفقنا بيوم من الايام .. بس هنا تحكمنا الضروف واكيد من باب المقولة اللي تكول الحلو مايكملش لازم هنا تصير احداث لكل واحد بينا ولازم تتغير الضروف لان الانسان يتغير بمرور الوقت ويبدي يفكر يوم بعد يوم بشكل مختلف وخاصة اجنا شباب ومو اي شباب احنا شباب من اللي يحبون ان يتحملون المسؤولية من الشباب اللي مايحبون ان يضيعون اوقاتهم حتى من جنا نضحك جان مو تضييع للوقت .. بس جنا كروب حلو كلش اتصور حتى جنا من المحسودين بالشركة لان جنا اذا واحد من عدنا عندة لفة والبقة جوعانين نتقاسمها كلنا وناكلها ونضحك وكانما كل واحد اكل لفة كاملة ... الله ايام وبنعشها ... اليوم الكروب اللي جنت احجي عنة مابقى منه غير شخص واحد وبس اللي هوه اني صار النه 8 اشهر سوية عشناها بمخاطرها .. وسهرها .. ونومها .. وكل شي ...
د. محمد (هيفاء) وهبي مثل ما جنت اسميك اول من تركنا وحول وقت العمل مالتة صحيح أشوفة بس مو مثل قبل شكد جانت مواضيعك حلوة من تتناقش بيها وكلشي بيك جان حلو ... د.سرمد صباح (نجيب) مثل ماجنت اسمي راح وسافر وترك العمل وراح الى الشمال هناك يمارس مهنتة الاصلية اللي اخذها بشهادتة طبيب اسنان سرمد جنت انسان طيب كلش ومن جنت اتحرك بالليل واني نايم تكعد وتكلي ها ليث خو محتاج شي اخاف الغطة مامكفيك !! اخاف المخدة مامرتاح بيها !! ... د. عمر طارق (المدلول) مثل ماجنا نسمي انتة اصعب شخص فقدتة لحد الان لان مو جنت صديقي لان جنت اني واحد من افراد عائلتكم انتة هسة بماليزيا تدرس .. تتذكر قبل ماتسافر شنو كلتلك ؟ كلتلك عمر اذا احد يبجي عليك هذا مايريدلك الخير بس اللي يحبك من يودعك راح يضحك ويبتسم ... واني جنت عند وعدي ... د. أحمد مثنى (سليم) بشنو ممكن ان القبك او اناديك لان بكل يوم جانت عندك تحشيشة جديدة وسالفة جديدة جنا نتشارك بيها اني وياك وجانت تثير غيرة البقية راح اسميك رفيق وقت العمل مستحيل جنت اتخيل يوم اداوم اذا مانكون كاعدين سوية وواحد يم الثاني .. ومن نام هم انام على فراش واحد وبغطى واحد حتى جانو الاصدقاء يصنفون علينة يكولون انتو شنو متزوجين الوقت كلة سوية !! انته اخر شخص هم غيرت وقت العمل مالتك وصارت الفترة اللي اشوفك بيها كصيرة كلش لان تزوجت وبديت بحياة جديدة .. المن بعد اشكي ؟؟ والمن بعد احجي ؟؟ وويامن اتداهر يااحمد مثنى يااخر امل الي بالشركة جان .. منو بعد يضحكني مثلك ومنو اللي يستمع الك مثل ماجنت استمع الك ؟؟ .... رسالتك لي اليوم الصبح انزلت دموعي اول مافتحت عيني وجانت اثرها كلش جبير علية هاي بعد راح ابقى وحدي واكيد راح ابدي اكون علاقات جديدة من بعدكم لان لازم الدنيا ماتتوقف على شخص ... بس ماراح الكي بدائل الكم ولا راح اكدر ان اعوض وجودكم حتى لو بالف صديق جديد ...
احبكم كلكم ومستحيل بكلامي هذا عنكم مااتمنالكم كل الخير حتى وبعدكم عني .. لقد انزلتم دموعي فساكتفي عن الكلام !!

Comments:
شكد سامعين عن الصداقة، صداقة بين بنيتين وصداقة بين ولدين او مجموعة شباب..او صداقة بين بنية وولد، لكل نوع من هاي الصداقة جنت اتوقعه مختلف عن النوع الثاني..جنت احس انو صداقة البنات تكون هي الصداقة المثالية الوحيدة بين كل انواع الصداقة الباقية..يمكن احس بيها مثالية لان اني بنية وجزء من شخصيتي هو احترام الصداقة، او لان عندي صديقات مستحيل اتخيل حياتي بدونهم، او لان مرينا سوة بمواقف معينة قوت بيها علاقتنا، وحتى لو اشوف غير بنات يكولون انو بينهم صداقة قوية وماكو مثلها..اكول بيني وبين نفسي...وبضحكة مغرورة..انتوا مكيفين بكونكم صديقات!!؟؟ حقكم ما تعرفون اني شنو عندي من صداقة مستحيل اكو شخص يتصورها..
اعرف كلامي هذا مو منطقي، واعرف اسبابه هم، فالشي الي يخليني ان اعتبر صداقتي مثالية وية مجموعتي هو لاعتزازي بيهم وبالذكريات الي تجمعنا ولحبي الهم ومعرفتي بيهم وبشخصياتهم وتفاصيل حياتهم ومشاعرهم، يكفيني مرات القي نظرة على وحدة منهم واعرف بشنو تفكر، ايامنا وضحكنا وبجينا وطلعاتنا ودراستنا...كلها اعتبرها مثالية..وصداقة ممكن تصير بين البنات وبس...
لكن اكتشفت اني على خطأ..اكتشتف انو الاحساس بين الاصدقاء موجود حتى وية الولد، انو تربطهم صداقات قوية وذكريات مثل الي تجمعنا سوية وية صديقاتي وماكو فرق، بس الفرق الوحيد احنة البنات وانتوا الشباب..اكتشفت انو الحزن موجود من احد يفارقكم وعينكم تدمع عليه، والفرح موجود بيوم الي احد منكم يحقق شي حلو بحياته، كل هذا الكلام اني حاسته وعايشته وية صديقاتي المقربات، تجاوزنا مسافات بالثقة وبالمعرفة وتخطينا هواية معوقات ومواقف وكلشي نمر بيه يقوي علاقتنا بالاكثر...
بس الشي الي فرحني علاقتك بيهم شلون حلوة وقوية ..وبينكم صفات مشتركة ووصفك الهم، ذكرتني بنفسي من اريد اوصف كل وحدة من صديقاتي واكوللها شي بداخلي الها او جزء من مشاعري تجاهها..والي دائما اكوللهم عن حبي الهم وفرحتي بصداقتنا..
لايون كنك، بحياتنا ناس تجي وتتقرب وتترك اثر ويروحون مجبورين على روحتهم، يروحون من طريقنا الي قطعنا سوة ودمعتهم بعينهم وما عاجبهم الي يصير بس الحياة فرضت هذا النوع من الفراق، اشخاص مثلهم ما اعتقد ممكن تنتهي الصداقة وياهم بمجرد ابتعادهم عنا..لان اكو الانترنيت واكو التليفون واكو حتى اوقات الفراغ الي احنة نصنعها حتى نواصل وية الناس الي نحبهم..

واكو اشخاص همة يختارون ان يبتعدون، اشخاص مثلهم هم راح نحزن ونسال عن سبب ابتعادهم عنا لكن بمرور الوقت راح نتعود على عدم وجودهم لان همة الي اختاروا الانسحاب...

كلما اقرأ سطر من البوست اكتشف بيك صفة جديدة، اول مرة غلاوة اصدقائك عندك وحبك الهم، ثاني شي تقديرك لمعنى الصداقة هذي الصفة الي توقعتها موجودة بس بينا احنة البنات، وثالث صفة (شكد حساس انت وعاطفي)...كلش عاطفي انت...لدرجة انو تتأثر بهاي الصورة..ما اكولك الموضوع ما يستحق..بالعكس اصلا الموضوع يستحق ويستحق ويستحق، بس لازم تعرف انو صديقك باقي ..وياك..موجود ..وما اعتقد بيوم الي تحتاجة يمك ما راح تلكاه، اكيد راح يكون بجانبك ويستمع الك ويحس بيك...فلا تنسى هذا الشي

اني ما اعرفه لصديقك لكن من خلال كلامك عنه حسيته بيه شبه منك..من طبعك وشخصيتك وسوالفك..فما اعتقد لو انت بمكانه تبتعد وتنسى كل الذكريات..لان الصداقة ما تنتهي بمجرد ان المسافات تزيد او الاماكن تتغير..
الصداقة شي روحي..مو بالضرورة تكون قريب بالمسافة من صديقك حتى تكون بينكم صداقة، او حتى تستمرون بصداقتكم..المهم تكونون متواصلين وتسالون على بعضكم وتكوفون لبعضكم بالمواقف الحلوة والمرة..

بس مرات حتى لو الايام تبعدنا عن اصدقائنا ..مو يعني نسيناهم ولا يعني تهون العشرة والايام الي جمعتنا سوة..
لان ما دام انت ما ناسيهم فهمة ما ينسوك حتى لو فرقت المسافة بينكم..
او شغلتكم الحياة والي بيها...

ما اكدر اكولك لا تحزن على فراقهم.. بس اكولك ان شاء الله الله يصبرك على فراكهم ويعوضك بأصدقاء جدد..اصدقاء مو يحتلون مكان الي راحوا بس على الاقل يعوضون ولو بجزء قليل وانت اجتماعي جدا وتعرف شلون تخلي المقابل يرتاح الك ويتواصل وياك ويكون وياك صداقة حلوة.

بس الذكريات الحلوة تبقى..وان شاء الله تبقى صداقتك وياهم طول العمر...

وكم جميلا لو بقينا اصدقاء..
 
في كل مرة من المرات من اكتب بوست جديد ومن اشوف الرقم واحد اللي يهمني تعليقة من بين الكل اقرا التعليق واشوف بي كلام ابلغ من اللي حسيت بي وكلتة .. ومرات احس انه التعليق هو الموضوع الرئيسي وموضوعي يصير هو التعليق .. هنا بالفعل حسيت اكثر انه الموضوع اللي كتبتة جان مجرد تعليق على التعليق الرئيسي مالتك واللي دائما يتصدر لان فعلا ومن صيغ الكلام اللي اختاريتيها حسيت فعلا جذبك الموضوع وحسيتي بي بكل عواطفك واحاسيسك تجاه كلمة صداقة ويامكثر الحكم والاقاويل اللي سمعناها عن الاصدقاء بس الاروع هو جان تعليقك على الوصف الحلو .. كلامك يصبر فعلا ويوضح اكثر معاني حلوة من الصداقة وتخلي جزء من الجدية اللي بداخلنا ان تتغلب على عواطفنا ...
اما وصفك بهذي السطور عن الصداقة فهو والله وبدون مبالغة اروع ماسمعت من كلام ((( ..الصداقة شي روحي..مو بالضرورة تكون قريب بالمسافة من صديقك حتى تكون بينكم صداقة، او حتى تستمرون بصداقتكم..المهم تكونون متواصلين وتسالون على بعضكم وتكوفون لبعضكم بالمواقف الحلوة والمرة )))
فعلا الصداقة بالدرجة الاولى شي روحي وهذا الشي محسوس بس ماكايلي من قبل ومن نكال وسمعتة لاول مرة منك حسيت بي اكثر وهذا احساسي هوة نفسة الاحساس اللي يرافقني حاليا من اضحك نفس ضحكتك المغرورة الداخلية واكول الحمد لله انه عندي شخص اكدر اسمي اكثر من صديق الي وهوه موجود وياية دائما حتى بدا يبعد عني كلمات كانت موجودة وبدات بالزوال
ياميشو اني اللي افتخر واني اللي اكول لكل العالم انتو هم مكيفين وتعرفون ناس واني عندي القمر !!
 
أتمني ان نتبنى جميعا كمدونين كلمه واحده بتاريخ واحد نحدد فيه رأينا للعالم اجمع
اتمني ان ندون مدونه واحد بتاريخ 27/07/2006
كلنا كمدونين نكرر عباره واحده
كلنا مع لبنان وفلسطين ضد اسرائيل والمحتلين
بالعربي بالانجليزي المهم نسمع صوتنا للعالم
وان لم نستطيع حمل السلاح فالنحمل الكلمه
ارجو النشر -تحياتي للجميع
 
عااااااااااااااااااااااااااااااا
اشو ماكو بوست جديد
كل يومية ادخل هنا عالموقع..تصدك لو لا؟ واكول اي بلكي اكو بوست جديد
واني اعرف ماكو وكت والله
بس هيجي دهرة
ههههههه

تحياتي
 
Post a Comment



<< Home

This page is powered by Blogger. Isn't yours?