Let's B Friends

البارحة اني كاعد على مائدة العشاء وبعد ماكملت وجبة العشاء جان الصحن الثاني اللي بعد العشاء كما معتادين هوة ماعون او صحن الفاكهة اللي افتقده دوما بسبب وقت عملي خارج البيت ولضيق الوقت اللي يمنعني من ان اكل الفاكهه او غيرها فوقت العمل او الانشغال بعملين كفيل بان يبعدك عن هواية امور رئيسية بحياتي بس دائما نحاول نغيرها ونغير اتجاه شراع سفينة الحياة وناخذها للطريق اللي احنا نريدة او اللي احنا نرسمة لانفسنا رغم التعب ...
جان صحن الفاكهة مختلف الانواع بي بس المميز بالنسبة الي هوة جان الخوخ اعتبرها فاكهة طيبة جدا وحتى شكلها راقي لان دائما لابسة قديفة !! جانت فاكهة الخوخ شكلها كلش مشهي بالاضافة الى كونها واصلة مرحلة من النضج بحيت بس تكول تعال واكلني !! بذيج الساعة مامثلت الي الثمرة طعم او شكل الخوخ اكثر مما مثلتالي المراحل اللي قطعتها هذي الثمرة من جانت بذرة الى ان نضجت واقتطفت وصارت كدامي على صحن .. تخيلت انه الفترات اللي عاشتها هذي الثمرة بكل الضروف من برد وحر الى ان وصلت الى المرحلة هذي شبهتها بفصل من فصول حياة الانسان من يعيش وية اشخاص او من يكون عندة اصدقاء او احباب لانه الانسان هم يقطع اشواط ومراحل الى ان توصل ثمرة احاسيسة وعواطفة الى النضج علمود تكون بوكتها صالحة للقطف وان يحصل عليها الشخص اللي يقدر هذي الثمرة من العواطف والاحاسيس ، طبعا الثمرة او هية الفاكهه نفسها ممكن ان تحافظ عليها اذا ما استهلكتها بان تحفظها مثلا بالثلاجة (ايام مجانت الثلاجة ثلاجة )* .. بس لازم تضل مطلع على هذي الفاكهه بين فترة وفترة خوفا من التلف فتضل بين فترة وفترة تشوفها وتطمئن على سلامتها وهية داخل الثلاجة يجوز طبعا راح تطرأ عليها بعض التغيرات بس ببطئ ...
هنا الربط بالموضوع يجوز صار محير عندي وكلت شلون ممكن الواحد يحافظ ويطور علاقاتة وصدقاتة ومشاعرة ويحافظ عليها والاخيرة هية الاهم عندي وخاصة بالوقت الحاضر لان جانت داخلة بمرحلة من مراحل النضج التدريجي لان جانت تنضج بشكل صحيح ومدروس وواقعي من مدة طويلة او كصيرة او ماادري اذا جانت طويلة او كصيرة دخلت مشاعري بمراحل من النضج بس بعد ماحان الوقت لقطفها او ماحان واني ماادري لان جنت محافظ عليها وماجنت واهبها لاحد من قبل لان احس وكانما المشاعر موجودة بداخل فد اسطوانة او كيس لازم الواحد مايستخدمة عشوائيا لان هذا ممكن ان ينفذ ويتيه الشخص المن يوهب الباقي منه بس بنفس الوقت ممكن ان يكون هذا الكيس متجدد دائما لمن يوهبه لشخص يستحق ان يعطى من هذي المشاعر والاحاسيس ..
بس الحفاظ عليها اشبه المحافظة الى ثمرة ومعلقة بشجرة لان لو يجي احد ويقطفها بوقتها المناسب او راح تسقط ومحد يستفيد منها بس احتمال بسقوطها راح تزرع نفسها مرة ثانية علمود ماتفقد الامل بنفسها الى ان يجي الشخص المناسب اللي يقطفها قبل سقوطها مثل بالمرة الاولى
بصراحة مريت بفترة ماجنت اعرف شنو اتجاه مشاعري واحساسي تجاه احد ما !! بس استمرت هذي الثمرة بداخلي بالنضج الى ان وصلت الى مرحلة جانت راح تشارف على القطف بس للاسف ماانقطفت بوقتها مع العلم جانت بالنسبة الي وقتها كلش حلو لان جانت الثمرة اللي بداخلي و الشخص اللي المفروض يقطفها واصلة مرحلة متناغمة بين الثمرة والقاطف بس الشخص هذا ابتعد مؤقتا بوقت وصول الثمرة الى النضج بس منو بقى اللي يخاف عليها بس صاحبها لان منع اي شخص من التقرب الها وبقى روحة مشبثها بيها علمود لاتسقط ومهما مر بضروف واحداث صعبة من ايام وليالي واحساس بالوحدة لان فقدت هذي الثمرة الى من يشكي اله .. بس ضل وكال هذي الثمرة راح تضل موجودة الى ان يرجع اللي يستحقها لان من راح يقطفها في حينها راح ينطلق الكلام وينكال اللي مفروض ان ينكال ...

فياقاطف الثمرة ..سويدائها بعدها لك والبذرة التي زرعت في داخلها انت من زرعها وراح يجي اليوم اللي نكول بي "" واحنا بالبستان كاعدين سوية "" وبيدنا هذي الثمرة !!