Friday, September 22, 2006

 

!! حبيس أفكاري

هل من المعقول بأن اوصل مرحلة وما ألكي لنفسي حل ؟ يخيل الي انه اللي صار عندي يشبه سقوط بغداد قبل يوم جانت بغداد جنة وبليلة ويوم صارت جحيم .. حاليا أعيش في أيام مظلمة تخليني أقيس كل الأمور بالجانب السلبي منها وبس بديت أشوف الخير بجانبه السيئ بديت أحس الصفات الحلوة هي سيئة بالتطبيق بديت أشوف صدق المشاعر هوه عبارة عن ورقة تدفع ضريبتها لاحقا بديت أشوف نص كلاص المي على أنه نصف فارغ ! وبديت أحس مملكتي راح تحتل !! المن جنت أحجي وألمن جنت أكتب والمن جنت أبني هذا اللي سميتة جدار وتحديت بي كل شي في سبيل ماينخدش وهسة راح ينهد أو يتحطم ؟ وبعدها شنو راح يكون مكان أثري لو كومة حجر !! معقول يصير بهذا البناء اللي جنت كل ما اوصل بي الى مستوى معين جنت أخلي فد علامة تبين أحترامي وتقديري للي وصلت اله .. مجان مجرد جدار وبس وانما جان سور يحيط بالمملكة اللي بنيتها يوم بعد يوم أو اللي بنيناها يوم بعد يوم على أساس من الصدق والثقة ... حيييييل ينراد عمر ثاني يلله ممكن أجدد الثقة لشخص ثاني وماممكن أن تجدد بالشكل المتكامل نفسة ، ياربي حرت ومدا أعرف وين القرار الصح ؟ أصير يارب مضحي على حساب نفسي لو أعيش نفسي عل أمل لو أترك الموضوع وأكول فوضت أمري الك ! لو أتخذ خطوة مخطط الها بس وقتها مو مناسب لو أتخذها علمود أنقذ نفسي من الضياع بقية العمر وأنقذ الموقف كلة بس راح أكون وحدي بهذي الجولة من التحدي لان مازلت شخص مجهول ومن الصعب أن يثق الناس أو يقتنعون بية ... لان لازم أثبت وجودي ، وشلون أثبت وجودي بهذا الوقت الصعب وشلون ممكن أملي عيون الناس ياربي أريد أعرف كلمن حب لازم يمر بهيج موقف ياربي بعدها الكلمة دا أتذوق طعمها ليش تنزع مني يارب بعدي بأول حرف منها بعدني ب ألفها ماوصلت بعدني للحاء ولا الباء ولالكافها صرت أحس بيها مثل أحساس الواحد الأخرس مايكدر يكولها بس يكدر يعبر عليها بتصرفاتة ... أفكار وتتضارب عندي ساعة أحجي بالمشاعر وساعة أحجي بالجد وساعة أسكت وساعات أبجي .. أعرف بأن موقفي مقدر من الطرف الثاني بس اني أحب كلشي يكون بوكته من جانبي وماأحب أن أجبر على فعل شي أحبه وأريدة ..في الأمس جنت أسمع أغاني بايقاع رومانسي شفاف واليوم أسمع أغاني فراق وبعد وأحزان ... صبرني يا الله

Comments:
اريد اكولك البوست حلو، بس اتردد، لان احساسك بالالم واضح، بس كدرت
توصلك احساسك، مشاعرك، رأيك، فكرتك، وكل اللي يدور ببالك..ما اكدر اظمن
الك ولا اي شخص ثاني يكدر يظمن الك اذا انت وصلت لمرحلة معينة ما تكدر
تلكي لنفسك حل!! لان كلشي بحياتنا غير متوقع مثل الي دة يصير والي دة
نمر بيه، ممكن اشجعك تتخذ الخطوة اللي المفروض ان تختارها، بس ما اريد
اصورلك وبنفس طريقة كلامك..على انو العالم وردي ومثالي ومتكامل، لازم
نعيش واقع سواء رضينا عليه او ما رضينا، اخاف اشجعك ان تختار الخطوة
اللي ببالك والي وصفتها "مو وكتها" بس النتائج "غيبية" ومحد يعرفها.

صدق المشاعر، والثقة اعتبره كنز وخاصة لو انبنى يوم بعد يوم بهذي الطريقة
الحلوة، محظوظة اني لان عندي ثقة بالشخص الي وثق بيه بعد طول فترة
تعارف وما انتابني اي خوف او حذر من تعامله وياية وبأي طريقة .

احس الكلام هواية، مهما اكتب ما راح يوفي احساسك بهذا البوست..فوض امرك
لله لان "الواحد" يعرفك زين، فاهمك، مقدر الظروف، صح جان يتمنى لو
كلشي يصير على راحته وببطء وبدون اي عراقيل بس هاي دنيتنا، بيها الحلو
وبيها المر، النتيجة مجهولة، والتوقعات ح تكون وحدة من 2...لو...
ولو....وتعرف شنو اقصد..
خليها على الله، واللي بي الخير يقدمه الك يارب..
 
شكرا على الكلام اللي كلتي بحق الكلام وبحق "الواحد" ... تطبيق الاشياء اللي مانكون محسبين الها بعمرنا تكون اصعب ما يكون وقتها الفعلي واتصور ممكن الواحد يقيس على اي شي بحياتة اليومية كان ينام مو بوقت النوم راح يشوف شكل اليوم عندة راح يتخربط والنظام اللي متعود علية صار بي ارباك . فكيف لو كان هذا القرار شي حاسم وبنفس الوقت مرغوب جدا في تطبيقة بس وكته ماحان .. يجوز هوه هذا وقتة واني غلطان ويجوز اني اقيس على الواقع واكون مصيب بكلامي .. صح اتخاذ القرارات صعبة بس لااني اللي احب انصاف الحلول ولا احب ان اترك اللي كدامي ينهد يوم بعد يوم واني اتفرج .. اعرف هنا راح اكون اني الملام واذا ماراح اكون ملام من غيري راح اكون ملام من نفسي بس راح العن واسب بوكتها الدنيا والضروف .. أتمنى ان من رب العالمين يخلي هذا العقبة للتأني مو علمود الشي اللي اريدة يروح مني غصبن عني .. اني مامتوقف عن التفكير بس التفكير بشكل مستقل ماراح يحل ولا يحقق هدف واحد عن طريق شخص واحد .. احتاج الى للكلام والنقاش بدون مشاعر !!
 
تتصور تكدر تناقش الموضوع بدون مشاعر؟؟ صح تجينا هواية اوقات نكول لنفسنا خلي نكون متماشين وية واقعنا اكثر، العاطفة راح تعيشنا بعالم ما يناسب وقتنا الحالي..
بس لوما العاطفة الموجودة ما جان صار من الموضوع "موضوع" وينكتب بوست ونحتار بي وتنزل دموعنا عليه ..ونحس بنفسنا راح نخسر سنة او اكثر من سنة من عمرنا...ونتحسر على الذكريات..

ولو كدرت تتناقش بي بدون مشاعر..اريد اعرف..واكيد راح يصير عندي خبر..مولو مومو؟
 
Post a Comment



<< Home

This page is powered by Blogger. Isn't yours?