Sunday, June 10, 2007

 

أنا ... والغربة داخل الوطن !!

اليوم حبيت أن اكتب عن موضوع أكيد لسبب معين او لحدث اشوفة كدامي او أعيشة ..
واليوم راح اكتب عن الغربة داخل الوطن .. وإحساسي بيها والشكل البسيط اللي عشته بالغربة خارج الوطن وداخلة وقارنت بيناتها وشفت على أي كفة رجح الإحساس الأصعب .
قبل أشهر سافرت إلى سوريا وجانت السفرة بيها اندفاع لكون كانت المرة الأولى بحياتي واني أسافر خارج ارض الوطن (أيام ماجان نسمي وطن) ، طبعا اللهفة والتحضيرات أكيد أي واحد ممكن ان يحس بيها من يريد ان يطلع او يسافر وخاصة اذا كانت لاول مرة .. طبعا السفرة كانت ل 12 يوم واكيد من بعد السفرة الرجوع الوطن والعائلة والأصدقاء والحبيبة .. من الواحد يدري بنفسة راح يرجع اكيد راح يتكرر علية هذا الاحساس ويتذكر شكل المعيشة اليومي وراح يتكرر الموقف اكثر من مرة وخاصة للي يطلع من العراق ويدري راح يرجع ماراح يحس باي تحسن بعد رجوعة وهذي الكلمة تتكرر من سنين من كل اللي سافروا ورجعوا !!

بصراحة اني من سافرت لهذي الفترة الكصيرة اكتشفت شنو معنى غربة مع العلم البلد عربي .. عرفت شنو معنى الاعتماد على النفس بالحياة بس بشكل موسع اكثر لان اني متجاوز هذا الموضوع هنا .. وعرفت شلون ممكن ان يكون التعامل مع شخص مغترب .. وعرفت وعرفت وعرفت ... بس بصراحة جانت دائما تراودني احاسيس اريد ارجع لبغداد .. طبعا الواحد من يسمع اسم بغداد الموسيقي والخيالي بالتسمية ماممكن ان تتبادر الى ذهنة هية نفسها بغداد اللي جنا نذكرها ونوصفها ونسميها باسمها بغداد ...
جان احساسي هناك بالرغم من الجو والامان والراحة بس اكو أشياء باقية ماتغيرت بداخلي اللي هية القلق والتفكير بالناس اللي ابتعدت عنهم بهذي المسافة الطويلة .. شنو يسوون هسة .. وشلون مكضين الوقت .. وشلون ديطلعون ويرجعون .. بالفعل الواحد ينفصل بهاي الفترة او السفرة ويحس اخبار اهلة صارت بعيدة .. ويبدي يقلق ويفكر ويخاف عليهم من أي خبر ممكن يعكر ايام سفرتة ...
الحمد لله انكظت السفرة وراح الوقت عليها ورجعت بسلامة والحمد لله الناس اللي تركتهم رجعت لكيتهم مثل ماهمة والحمد لله وكلهم بصحة وعافية الا الوضع الامني اللي جنت اشوفة اخذ بالتردي من انفجار الجسر الحديدي الى الانفجارات اليومية المسموعة !!
بالفعل جانت تجربة اكتسبت بيها فد خبرة ولو بحيز زغير بالحياة بس ماانكر جانت تجربة حلوة .. بس ابدا ماجانت حل ولا حتى جانت هروب من واقع ... لان رجعت الى نفس الروتين بس بقليل من التجديد النفسي اللي راح وانطمر ومات بالرجوع الى شكل الحياة الحالي ... ماانكر اكو ساعات اعيشها باوقات تنسيني الدنيا واللي بيها وسوريا وكل ايامها وونستها بس هذي الساعات للاسف محسوبة علية بالوقت الحالي بس اتمنى ان تكون ساعات اعيشها بالاحساس ذاتة ولكل العمر .. ان شاء الله
رجعت ... ورجعت الى الحياة الاعتيادية اللي افتقدتها من جنت بسوريا .. لان اكو من يتواصل بالسؤال علية واكو من يداريني ويخاف علية كل هذي الاشياء الواحد يفتقدها من يكون مسافر او بعيد عن اهلة وناسة ، الحياة اللي اعيشها اني هنا هية عبارة عن خمس ايام عمل لـ 8 ساعات ونص يوميا و يومين اووف اكضي بالحر بالبيت أو ازور بعض الاصدقاء وهية هذي اليومين الوحيدين اللي امارس بي حقوقلي من اكون بالبيت بدون أي تقيد ... طبعا من اكول حقوق يعني حقوق مواطن عراقي واللي مجرب ان يكون عراقي هوه اللي راح يعرف يعني شنو حقوق !!!
اما باقي الاسبوع او الخمس ايام اللي اكضيها برة البيت وتحديدا بمكان الشغل ف اني هنا احس بمعنى الغربة اللي اريد ان احجي بي وهوه داخل الوطن .. ليش ؟؟
لان اتقيد بالحركة خوفا من الوضع الامني ... اتقيد من ان ارجع للبيت لسوء المناطق اللي ممكن امر بيها خلال الرحلة اليومية من الازدحامات والهوسة والطلقات اللي مايعرف الواحد منين والغرض منها هية فتح الطريق باسرع وقت لان الوقت عدنا بالعراق كلش كلش مهم.
طبعا بقائي هنا بالشغل لاسباب احس بيها بالغربة الواحد ماممكن ان يتعرض الها مهما كانت تحمل الغربة من ضغوط نفسية وضغوط تضرب على الوتر العاطفي واحنا بعد ماينراد النا نحجي بالعواطف والحنين ، يعني لو جمعت كل ما ممكن الواحد يشوفة برة باللي يخلي يمتنع من ان يرجع لبيتة اللي يبعد عنة بـ أرباع الساعات بس الحدث المتوقع او سماع الاخبار المحيطة اللي تخلي الواحد يتغرب بداخل وطنة وبين اهلة ...
اني ماارجع للبيت علمود خطورة الطريق ... ماارجع للبيت بسبب الوضع الامني والسيطرات الوهمية والغير وهمية .. ماارجع للبيت بسبب غلاء سعر البنزين .. ماارجع للبيت لان كهرباء ماكو .. ماارجع للبيت لان مرات مي هم ماكو .. كل هذي بصراحة ماحسيت بيها بايام الغربة وان كانت هية ايام لتغيير الجو النفسي علية .. بس مجانت بهذي الصعوبة وحتى وان كنت متغرب بالفعل او قاصد الغربة ، اني مااعرف شنو اللي خلاني اكتب عن هيج موضوع مع العلم اني بداخلي متحمل هموم تخص السياسة والوضع العام والمعيشة بس مااحب ان اذكرها لان كلنا ممكن نعيشها اذا مو نسمعها على رأس كل ساعة وساعة ومااريد ازيد بيها الهموم لان نحتاج دائما من يزيحها عنا بس استغليت الوقت الحالي اللي اني بي بالشغل وحبيت ان اكتب بوست اكون بي متواصل للاحداث او الافكار اللي تدور على بالي ...
صعبة بالفعل الغربة اللي الواحد يعيشها يوم بعد يوم ... اني صارلي هسة 3 ايام ماراجع للبيت وراح ارجع باجر .. من ارجع احير شنو اسوي وشلون اشغل وقتي وللاسف اصير اوصل لمرحلة بالتعجرف بالراي والانانية بالتفكير لان اريد ان امارس حقوقي واني بداري ومكان عيشتي وان اتدلل على اهل بيتي بسبب الضغط اللي ممكن ان احسة واني برة البيت ..
سوري اذا جان هذا الموضوع بس فد نظرة يجوز اسميها تشاؤمية شوية بس هية واقعية وبعيدة عن أي شي خيالي ... بس يبقى بداخلي الاحلام والاهداف والطموحات اللي احب وأريد ومصر على تحقيقها وان ساءت الاحوال والضروف مهما كانت .. لان اكو بداخلي احساس انساني وضمير وتفكير ينقلني من السلبية للايجابية بـ 360 درجة باتجاه الحياة ...

Comments:
كلما افكر بستايل حياتك وشغلك واتذكر صعوبة الظروف الي عايشيها اكول شلون متحمل وشلون كدرت تستمر وعلى نفس الاصرار على شغلك وعلى طموحك، يمكن لو اني ان استسلمت من زمان، بس وية تشجيع الي احبهم اكيد راح اتقوى مرة ثانية واكدر ارجع من جديد..وحدة من الصفات الي عجبتني بيك طموحك، وصبرك وتريد دائما توصل نفسك لدرجة تكون راضي عن كل الايام الي عشتها ومتاكد كسبت منها شي اذا مو مادي ف يكون معنوي من علاقات وصداقات وتجارب سواء ايجابية او سلبية تساعدك ان تستمر بحياتك وتعرف شلون تختار الطريق الي يناسبك وتعرف تختار الاشخاص الي يقدروك مثل ما انت..
الغربة صعبة والاصعب لمن نعيش ببلد بعيد عن كل اهلنا وتبقى حسرة بكلوبنا واحساس بالذنب انو شلون اني مرتاحة هنا الي احبهم ببغداد وتعبانين ويعانون كل يومية من صعوبة الحياة والوضع الامني والكهرباء والمي واني اتونس ومرتاحة ومتنعمة بالامان والكهرباء والجو حلو واكدر اطلع واغير جو بأي وكت ولاي مكان..وحسرة بالكلب وسؤال يدور ويتكرر (ليش احنة مو هيجي؟ ليش مو مثلهم عايشين) وهم الغربة ما يتعاملون بطريقة حلوة اكو منهم تبدي عنهم العنصرية والانتماء الوطني وتحس بغربة اكثر بسبب هذا التعامل وتكول وين احنة العراقي احسن من هذا الي من البلد الفلاني..حتى لو جان العراقي مليان عيوب ومشاكل...
الموضوع ما بي شي تشاؤمي بس هو سرد للاحداث .صح اول ما قريت البوست حسيت اكو تشاؤم بس من قريته اكثر من مرة كلت هذا سرد احداث ورأي شخصي..بالعكس حلو ان تكتب بوست يخصك لان هذا البلوك شخصي ويخصك انت..بس مو معناها باقي المواضيع مو حلوة بالعكس انت دائما تتميز برأيك وكلامك وكتاباتك ووصفك لكل شي يعجبك او تمري بي..

لايون كنك خليك مثل ما انت..على طول...
 
Post a Comment



<< Home

This page is powered by Blogger. Isn't yours?